Ворен Бафет ретко јавно коментира за политички прашања, но овој пат реши јавно да проговори за трговската политика на американскиот претседател Доналд Трамп и царините кои треба да стапат на сила утре. Во интервју за CBS News тој предупреди дека таквите мерки можат да предизвикаат негативни последици за економијата и потрошувачите.
-Тарифите се всушност…имавме големо искуство со нив. Тие се, до одреден степен, чин на војна – рече Бафет.
Неговиот конгломерат „Беркшир Хатавеј“ работи во различни сектори, вклучувајќи осигурување, железница, производство, енергија и малопродажба, давајќи му широк увид во економските трендови.
Трамп минатата недела најави воведување на огромни царини од 25% за увоз од Мексико и Канада, додека Кина ќе биде погодена со дополнителни 10% царини. Овие мерки ќе стапат на сила на 4 март, а Пекинг веќе најави дека ќе преземе соодветни контрамерки.
Бафет предупреди дека тарифите на крајот претставуваат данок на стоки, чии трошоци ќе ги сносат потрошувачите.
– Со текот на времето тие се едноставно данок на производите. Па што? – рече тој.
Ова не е прв пат Бафет да коментира за трговските конфликти. За време на првиот мандат на Трамп, помеѓу 2018 и 2019 година, тој веќе предупреди дека агресивните трговски потези може да имаат негативни глобални последици. Во тоа време, САД беа вклучени во трговска војна со Кина, што предизвика големи нарушувања на финансиските пазари и влијаеше на цените на бројни производи.
Овој пат, сепак, Бафтер не сакаше директно да коментира за состојбата на американската економија.
-Мислам дека тоа е најинтересната тема на светот, но нема да зборувам за тоа. Навистина не можам – рече тој.
