Јавниот обвинител побара мерки на претпазливост за 47-годишен маж, против кого е поведена истрага за „Тешки дела против безбедноста на луѓето и имотот во сообраќајот“, откако во алкохолизирана состојба удрил во пешак на обележан премин.
„Обвинителството предложи привремено одземање на возачката дозвола и забрана за нејзино издавање, забрана за напуштање на живеалиштето или престојувалиштето, обврска на осомничениот да се јавува на одредено службено лице во судот, како и привремено одземање на патна исправа за преминување на државна граница“, информираат од Обвинителството.
Настанот се случил на 2 март, веднаш по полноќ, на улицата Св. Кирил и Методиј. Осомничениот управувал „мерцедес“ во левата сообраќајна лента, но не се придржувал кон сообраќајните прописи, загрозувајќи го јавниот ред и безбедноста. Според истрагата, тој возел со 1,35 промили алкохол во крвта и со брзина поголема од дозволената. Пристигнувајќи до обележаниот пешачки премин, не ја намалил брзината ниту запрел, по што со предниот дел од возилото удрил во левата страна од телото на пешакот, која во тој момент ја поминувала улицата.
„Од ударот оштетената се здобила со тешки телесни повреди – скршеница на долните екстремитети“, додаваат од Обвинителството.
По завршувањето на истражната постапка, ќе следуваат дополнителни правни чекори во согласност со законските процедури.
