Првиот човек на НАТО му рекол на Зеленски да најде начин за да ги среди односите со САД

Генералниот секретар на НАТО Марк Руте денеска за Би-Би-Си изјави дека судирот меѓу американскиот претседател Доналд Трамп и украинскиот претседател Володимир Зеленски во Белата куќа е „несреќен“ и дека двајцата лидери треба да работат на корекција на нивните односи.

– Разговарав со претседателот Зеленски двапати по телефон. Му реков ова: мораме да останеме заедно – САД, Украина и Европа – за да ја доведеме Украина до траен мир – рече Руте.

На прашањето што му рекол Зеленски за средбата со Трамп, Руте одговори дека не може да ги открие деталите од разговорот, но нагласи: „Она што му го кажав јасно е дека навистина мораме да го почитуваме она што претседателот Трамп досега го направи за Украина“, мислејќи на напредните противтенковски системи што САД претходно му ги доставија на Киев.

- Advertisement -

Руте нагласи дека Украина немало да биде „никаде“ без американската поддршка. „Му реков: Навистина треба да му оддадеме признание на Трамп за она што го направи тогаш, за она што Америка го направи оттогаш и она што Америка сè уште го прави“.

Тој, исто така, инсистираше на тоа дека Трамп е посветен на обезбедување траен мир во Украина, но очекува поголеми трошоци за одбрана од европските членки на НАТО и од Канада

– Слушајте, разговарав со Доналд Трамп половина час во четвртокот. Ние сме пријатели. Работевме заедно со години. Знам дека тој е посветен да ја доведе Украина до траен мир. Тој е посветен на НАТО. Се разбира, тој очекува европските сојузници во НАТО и Канада да инвестираат повеќе и да го зголемат производството на оружје. И тој е во право за тоа – истакна Руте.

Тој е апсолутно убеден дека САД сакаат да ја доведат Украина до траен мир и уверува дека ова му го кажале сите високи претставници на американската администрација.

– Но, она што е клучно е сите да соработуваме во овој процес. Исто така, важно е претседателот Зеленски да најде начин да ги обнови односите со американскиот претседател и највисоките функционери во Вашингтон – рече тој.

Руте рече дека утре ќе се одржи важен состанок во Лондон на кој ќе присуствува и украинскиот претседател.

– Кога ќе се постигне мировен договор, од клучно значење е – и мислам дека тоа ќе биде јасно по утрешниот состанок – дека многу европски земји се подготвени да дадат безбедносни гаранции за Украина и да се погрижат овој мировен договор да биде издржлив и Русите никогаш повеќе да не го доведуваат во прашање –  заклучи Руте.