Израелската армија соопшти дека во вторникот нападнала воени цели во јужна Сирија. Сириската опсерваторија за човекови права објави дека во нападите загинале две лица. Армијата го нападна и Либан, каде што две лица загинаа, а уште две се ранети во напад со дрон, јавуваат локалните медиуми.
„Во текот на изминатите неколку часа, ИД (израелските одбранбени сили) нападнаа воени цели во јужна Сирија, вклучувајќи командни центри и бројни локации за оружје“, соопшти израелската војска.
Таа додаде дека присуството на воени сили и опрема во јужна Сирија „претставува закана за граѓаните на Израел“, пренесе француската новинска агенција АФП.
Според Сириската опсерваторија за човекови права, нападите биле насочени кон два воени објекти јужно од главниот град Дамаск и воени цели во провинцијата Дара. Најмалку две лица загинаа во еден од нападите јужно од Дамаск, соопшти Опсерваторијата.
Новите напади врз Сирија доаѓаат откако израелскиот премиер Бенјамин Нетанјаху минатата недела изјави дека Израел нема да дозволи присуство на сириски вооружени сили во близина на границата со Израел.
Во меѓувреме, израелската армија во вторникот со дрон го нападна и градот Шара во источен Либан, при што загинаа две лица, а други беа ранети, јавуваат локалните медиуми.
Израел и либанското шиитско движење Хезболах постигнаа договор за прекин на огнот на крајот на ноември минатата година. До крајот на продолжениот рок на 18 февруари, израелските сили се повлекоа од селата во јужен Либан, но ги задржаа трупите на пет позиции. Двете страни меѓусебно се обвинуваат за прекршување на примирјето.
