Зеленски им се заблагодари на Украинците за херојството

Украинскиот претседател, Володимир Зеленски денеска, по повод третата годишнина од почетокот на војната во таа земја, му порача на украинскиот народ дека е горд на херојството што го покажаа за време на конфликтот.

Зеленски во објава на Х, изрази гордост и благодарност до сите кои ја бранат и поддржуваат државата.

„Три години отпор. Три години благодарност. Три години апсолутно херојство на Украинците. Горд сум на Украина!“, напиша Заленски.

- Advertisement -

Тој им се  заблагодари на „сите што ја бранат и поддржуваат“ Украина, додавајќи дека Украина се сеќава на оние кои ги загубија животите бранејќи ја земјата.

Претходно утринава претседателката на Европската комисија Урсула фон дер Лајен и претседателот на Европскиот совет Антонио Коста пристигнаа во Киев.

„На третата годишнина од бруталната инвазија на Русија, Европа е во Киев. Денеска сме во Киев, бидејќи Украина е Европа. Во оваа борба за опстанок, не е во прашање само судбината на Украина. „Ова е судбината на Европа“, рече Фон дер Лајен во објава на мрежата X.

Денеска се одбележува третата годишнина од почетокот на војната во Украина, а наскоро се очекува да продолжат руско-американските преговори за ставање крај на војната, во која Украина и ЕУ не се вклучени.

Во Киев денеска се одржува самит посветен на одбележувањето на третата годишнина од почетокот на војната во Украина, а на самитот ќе учествуваат вкупно 37 државни лидери, што претседателот Зеленски го нарече „пресвртница“.