Италијанскиот пејач Оли, победник на овогодинешниот фестивал во Санремо, нема да учествува на Евровизија во швајцарскиот град Базел, а ќе биде заменет од второпласираниот Лучио Корси. Оли, кој триумфираше во Санремо со песната „Balorda Nostalgia“, во објава на социјалните мрежи соопшти дека се откажува од учеството на Евровизија во мај.
Неговото место го зазеде второпласираниот Лчио Корси (30), кој ќе ја претстави Италија со песната „Volevo essere un duro“. Веста ја потврди италијанската телевизија Раи, а Корси им се заблагодари на своите обожаватели за поддршката, изразувајќи радост што ќе ја претставува својата земја на најголемата музичка сцена во Европа.
Лучио Корси се смета за еден од најоригиналните артисти на италијанската музичка сцена. Неговата музика комбинира елементи од фолк и рок, а неговите текстови му донесоа статус на еден од најценетите уметници на својата генерација. Роден во Гросето, Тоскана, во семејство на мајка сликарка и татко занаетчија, Корси уште од детството покажувал интерес за музиката. Првите настапи ги одржувал во клубови и на плоштади во својот роден град, а своето искуство го надградувал свирејќи во локални бендови. Подоцна се преселил во Милано, каде што го оформил својот уникатен музички стил.
Како дел од „Големата петка“, Италија има загарантирано место во финалето на Евровизија. Тоа значи дека Корси ќе настапи директно во финалната вечер, која ќе се одржи на 17 мај, додека двете полуфинални вечери се закажани за 13 и 15 мај.
Покрај подготовките за Евровизија, Корси во април ќе започне турнеја низ Италија, со концерти во Рим и Милано, каде што ќе ја претстави својата нова музика пред домашната публика.
Со својата уникатна уметничка визија и посветеност кон музиката, Корси е подготвен да ја претстави Италија на најголемата музичка сцена во Европа и да остави впечаток на публиката ширум светот.
