Италијанската премиерка Џорџа Мелони изрази уверување дека САД и Европа ќе останат блиски и сојузнички, иако расте загриженоста во Киев и неколку европски земји поради можноста за поблиски односи меѓу Вашингтон и Москва под водство на Доналд Трамп.
Во своето излагање синоќа на англиски јазик, преку видео врска на Конференцијата за политичко дејствување на конзервативците (ЦПАЦ), која се одржа во Националниот конгресен центар Гејлорд во близина на Вашингтон, Мелони нагласи дека надежите дека Трамп ќе се дистанцира од Европа се неосновани.
– Нашите противници се надеваат дека претседателот Трамп ќе се дистанцира од нас, но знаејќи го како силен и ефективен лидер, се обложувам дека оние што се надеваат на поделба ќе згрешат – изјави Мелони, истакнувајќи дека се очекува продолжување на партнерството меѓу Европската унија и САД.
Мелони, која од почетокот на воената агресија на Русија силно ја поддржува Украина, потсети на ангажманот на Европа и САД за слобода и праведен мир за украинскиот народ.
– Тоа го правевме заедно во изминатите три години во Украина, каде што гордиот народ се бореше за слобода против бруталната агресија, и денес мора да продолжиме да работиме заедно за праведен и траен мир – додаде таа.
Нејзините поддржувачи ја гледаат како можен посредник меѓу Европската унија и Вашингтон, што дополнително ја зголемува важноста на нејзините изјави и позиција во меѓународната политика.
