По осум часа драматична борба со времето, пожарникарите-спасувачи во српскиот град Лазаревац вечерва успеаја да го извлечат работникот Милан Рајковиќ, кој беше затрупан во канал во селото Петка.
Министерот за внатрешни работи на Србија, Ивица Дачиќ, лично ја потврди добрата вест на Инстаграм, споделувајќи снимка од моментот кога спасувачите го извлекоа работникот.
„Спасен е Милан Рајковиќ. По осум часа. Бескрајна благодарност до пожарникарите-спасувачи. Ваквите моменти го прават животот вреден за живеење“, напиша Дачиќ.
Инцидентот бил пријавен нешто по 15 часот, кога тројца работници копале канал за топловод и биле затрупани од одрон со слој од околу три метри земја.
Двајца од нив биле брзо извлечени, но трет работник останал заглавен под земјата, што довело до долга и неизвесна спасувачка операција. Дополнително, во текот на интервенцијата се случил нов одрон, во кој бил затрупан и пожарникар од Лазаревац, но тој бил спасен навреме.
Во спасувачката мисија учествувале 20 пожарникари и спасувачи од противпожарните единици на Лазаревац, Кошутњак, Обреновац, Железник и Барајево, со шест возила. Дополнително, биле ангажирани и двајца членови на Специјалистичката екипа за спасување од урнатини при Министерството за вонредни состојби.
Работникот, по спасувањето, веднаш бил пренесен во болница, каде што му се укажува лекарска помош.
