Хамас денеска ги предаде телата на израелските заложници, меѓу кои и две деца

Телата на израелската мајка и нејзините две деца се меѓу четирите што Хамас ќе ги предаде во четврток. Според Хамас, сите тие биле убиени во израелските воздушни напади на почетокот на војната во Појасот Газа.

Шири Бибас, четиригодишната Ариел и деветмесечниот Кфир беа киднапирани од кибуцот за време на напад во октомври 2023 година.

Таткото на децата, Јарден Бибас, беше ослободен на 1 февруари како дел од прекинот на огнот меѓу Хамас и Израел.

- Advertisement -

Водачот на Хамас, Калил ал Хаја, во вторникот изјави дека остатокот од семејството ќе биде меѓу четирите тела што ќе му бидат предадени на Израел.

Хамас, исто така, планира да го ослободи телото на мировниот активист Одед Лифшиц, кој имал 83 години кога бил киднапиран.

Хамас тврди дека сите биле убиени во израелските воздушни напади на почетокот на војната.

Премиерот Бенјамин Нетанјаху рече дека ќе биде „многу тежок ден за државата Израел. Вознемирувачки ден, ден на тага“.

Семејството Бибас стана моќен симбол на 251 Израелец киднапиран на 7 октомври – и не само затоа што Кфир беше најмладиот меѓу нив.

Телата ќе бидат предадени на Црвениот крст, а подоцна ќе бидат извршени ДНК тестови за да се потврди нивниот идентитет.

Израел претходно изјави дека е крајно загрижен за состојбата на Шири, Ариел и Кфир, но никогаш не ја потврди нивната смрт.

Тие беа киднапирани во Кибуц Нир Оз, една од многуте заедници кои беа прегазени од членовите на Хамас на денот на ненадејниот напад.

Во меѓувреме, шест живи заложници, последните ослободени според првата фаза од договорот за прекин на огнот во Газа, ќе бидат ослободени во сабота, според Хамас.