Најмалку четири лица, меѓу кои и едно дете, беа повредени во масовен руски напад со беспилотно летало врз градот Одеса и областа Одеса на југот на земјата на 19 февруари, објави гувернерот Олех Кипер. Сите повредени се хоспитализирани и нивните повреди се полесни.
Според Кипер, во нападот биле оштетени детска клиника, градинка, катни згради и автомобили.
– Нападот резултираше со прекин на електричната енергија, оставајќи 14 училишта, 13 градинки и повеќе од 500 домови без греење – изјави градоначалникот Хенадиј Труханов.
Гувернерот додаде дека итни прекини на електричната енергија се на сила и на други места во регионот Одеса и дека сите надлежни служби работат на решавање на ситуацијата.
Утрово нападот на градот Одеса го потврди и претседателот на Украина, Володимир Зеленски.
– Најмалку 160.000 жители на Одеса сега се без греење и струја. Тринаесет училишта, градинки и неколку болници исто така останаа без струја или греење – истакна Зеленски.
Исто така Украина во текот на ноќта нападна нафтена рафинерија во градот Сизран во руската област Самара, изјави регионалниот гувернер.
– Итните служби работат во погодената област. Според прелиминарните информации, нема жртви – напиша Вјачеслав Федоришчев на Телеграма.
Тој не прецизираше дали рафинеријата е оштетена. Телеграмските канали База и Маш објавија дека по нападот избувнал пожар.
Руското Министерство за одбрана соопшти дека системите за воздушна одбрана уништиле девет украински беспилотни летала во текот на ноќта, над регионите Брјанск, Татарстан и Тула и Црното Море.
За потсетување, руско-американските преговори на високо ниво завршија вчера во Ријад.
Русија ја претставуваа рускиот министер за надворешни работи Сергеј Лавров, помошникот на претседателот Јуриј Ушаков и шефот на РФИФ Кирил Дмитриев, додека САД беа претставени од помошникот на претседателот за национална безбедност Мајк Волц, државниот секретар Марко Рубио и претседателскиот пратеник за Блискиот Исток Стивен Виткоф.
Како што изјави Ушаков, разговорите се фокусирале на договор за тоа како да почнат преговорите за Украина.
По разговорите руската и американската делегација најавија позитивни резултати, договор за заедничко решавање на проблемите и подготовки за нови средби.
