Мета планира да изгради подводен кабел околу целата планета

Проектот Вотерворт вклучува изградба и поставување на масивен подводен кабел долг 50.000 километри кој ќе ја опфаќа целата планета и ќе поврзува пет континенти.

Гигантот „Мета“ – кој ги поседува Facebook, Instagram и WhatsApp – сака да го прошири своето присуство во областа на технологијата надвор од социјалните мрежи, вклучувајќи ја и вештачката интелигенција, како и потребната инфраструктура за поддршка, пренесува РТС.

Новиот проект за подморски кабли ќе обезбеди исклучително поврзување меѓу пет големи континенти и ќе им помогне на идните планови на Мета во областа на вештачката интелигенција.

- Advertisement -

„Проектот ќе овозможи подобра економска соработка, ќе обезбеди дигитално вклучување и ќе отвори можности за технолошки развој во овие области“, наведува Мета.

Кабелот ќе биде најдолгиот кабел некогаш направен, со структура на влакна од 24 парови, што овозможува поголем капацитет.

Подводните кабли станаа исклучително важни во последните децении бидејќи овозможуваат функционирање на бројни дигитални услуги и брз пренос на огромни количини на податоци.

Доволно е да се каже дека повеќе од 95 проценти од интернет сообраќајот во светот се пренесува преку подводни кабли.

Телекомуникациската компанија Телеџиографи наведува дека во моментов се користат околу 600 подморнички кабли ширум светот.

Еден од нив е кабелот „2Африка“, финансиран од „Мета“ и мобилните оператори „Оринџ“, „Водафон“ и „Чајна мобиле“, долг 45.000 километри и поврзува три континенти.