Во главниот град на Саудиска Арабија, Ријад, почнаа преговорите помеѓу руската и американската делегација за завршување на војната во Украина.
Како што јавија руските медиуми, преговорите се водат во една од палатите на кралското семејство, во Дирија, во комплексот Албасатин.
Ниту Украина ниту ЕУ не присуствуваат на состанокот, при што Киев сигнализираше дека нема да ги признае резултатите од разговорите доколку не бидат вклучени.
– ЕУ е суштински исклучена од разговорите за иднината на Украина бидејќи не вложи соодветна сума пари во војската – изјави за Фајненшал тајмс извршниот директор на германската одбранбена компанија „Рајнметал“, Армин Папергер.
Рајнметал е едно од клучните претпријатија што ја снабдува Украина со воена опрема.
– Ако не инвестирате, ако не сте силни, тие се однесуваат со вас како со деца… Ако родителите вечераат, децата треба да седат на друга маса. САД преговараат со Русија и ниеден Европеец не е на маса – стана многу јасно дека Европејците се децата – додаде тој.
Кирил Дмитриев, извршниот директор на Рускиот фонд за директни инвестиции, потврди дека веќе се сретнал со членовите на тимот на американскиот претседател Доналд Трамп, опишувајќи ги како „одлични решавачи на проблеми“. Тој одби да шпекулира за потенцијалните ветувања што Вашингтон ќе ѝ ги даде на Москва, сугерирајќи дека страните мора прво да имаат сеопфатен дијалог.
Многу е важно САД и Русија да „изградат мостови“, изјави Дмитриев за Си-ен-ен пред разговорите. „Односите меѓу САД и Русија се многу важни за светот“, рече тој, нагласувајќи ја потребата за соработка.
Запрашан дали неговата клучна цел е да се укинат американските санкции против Русија, Дмитриев истакна дека американските компании најмногу страдаат од ограничувањата. „Американските компании се тие што загубија 300 милијарди долари од напуштањето на Русија“.
Во Ријад допатуваа шефот на руската дипломатија, Сергеј Лавров, и помошник-претседателот на Русија, Јуриј Ушаков.
Американската делегација е предводена од државниот секретар Марко Рубио.
