Дилерите заработуваат и по 50.000 евра дневно на станицата „Клемансо“?

Едно лице е убиено синоќа на влезот од метро станицата „Клемансо“ во бриселската населба Андерлехт, јави дописникот на МИА од Брисел.Полицијата и натаму трага по напаѓачот, кој сè уште е во бегство. Според белгискиот весник „Либр“, во моментот на инцидентот полицајци стоеле на „само неколку метри“ од влезот на станицата.

На снимките од безбедносните камери се гледа како лице облечено во црно и со качулка на главата со истрели од огнено оружје застрелува млад човек, по штое бега од местото на настанот. Жртвата, која според неофицијални информации е 19-годишен дилер на дрога, починала на лице место на влезот во станицата.

Лице кое било близу станицата во време на инцидентот, за државната телевизија ВРТ, изјави дека се слушнале три истрели.

- Advertisement -

Градоначалникот на Андерлехт, Фабрис Кампс, пак, изјави дека инцидентот се случил „и покрај засиленото полициско присуство на само 70 метри“.

– Тоа е показател дека овие негативци нема да запрат. Мораме да продолжиме да ја контролираме оваа локација, но тоа не е доволно. Треба да ги засилиме судските истраги за да ги разбиеме мрежите и оние што ги влечат конците – додаде Кампс.

Според него, реонот на станицата „Клемансо“ претставува „важна продажна точка за дрога“, од каде нарко дилерите дневно заработуваат и по 50.000 евра.

Полициски извори претпоставуваат дека ова е уште инцидент е дел на тековната „војна“ меѓу криминалните банди за контрола на теренот, во чии рамки минатата недела во реонот околу станицата „Клемансо“ имаше три оружени инциденти, при кои загина едно лице, а друго беше рането.

Бриселското Јавно обвинителство соопшти дека во интерес на истрагата нема да дава дополнителни коментари за синоќешниот инцидент.

Набрзо по инцидентот местото го посети белгискиот министер за внатрешни работи и безбедност Бернар Квинтан, кој за денеска најави итни консултации околу криминалните пресметки во Брисел, а пред се во Андерлехт.

– Јасно е дека треба да преземеме дополнителни строги мерки – рече Квинтан.

оради, инцидентот неколку часа имаше делумен прекин на сите четири линии на бриселското метро, на една трамвајска и на неколку автобуски линии.