Во Хрватска денеска почна нов еднодневен бојкот на шопинг поради високите цени, на повик на потрошувачката платформа „Ало инспекторе“.
Ова е четврти петок по ред во кој се бојкотираат продавниците, а платформата го поддржа повикот на средношколците за бојкот на пекарниците поради драстичното поскапување на пекарските производи.
„Денес повторно го бојкотираме шопингот. Сè. Производи и услуги. Со посебен „ентузијазам“ ја поддржуваме иницијативата на средношколците: бојкотирајте ги пекарниците и пекарските производи каде и да се“, објавија на Фејсбук од платформата „Ало, инспекторе“.
Советникот на платформата Јосип Келемен рече дека потрошувачите сакаат да продолжат акциите и да се намали потрошувачката за да се испрати порака до сите што работат на покачување на цените. Тој вчера на прес-конференција посочи дека се проценува дека поради бојкотот трговците досега изгубиле над 100 милиони евра.
Покрај еднодневниот бојкот, од сабота седум дена ќе се бојкотира и еден малопродажен синџир Плодин. Претходно седум дена беше бојкотиран трговскиот синџир Конзум.
Претходните три петока беа бојкотирани сите продавници, на кои масовно присуствуваа граѓаните, иако нивниот одѕив се намалуваше.
Според податоците на Даночната управа, во времето на првиот бојкот, на 24 јануари, вкупниот број на фактури на мало бил за 44 отсто помал од седум дена претходно, а вкупниот износ на издадените фактури бил за 53 отсто помал.
Бојкотите беа поддржани од синдикатите, опозицијата и владата.
Во меѓувреме, Владата одлучи да ја прошири листата на производи со ограничени цени на 70 наместо на 30 производи, а во продавниците мора да се видат полиците со производи со ограничени цени.
