Полицијата во Босна и Херцеговина трага по Емир Селимовиќ, кој е осомничен дека синоќа во Калесија ги убил сопругата и 13-годишниот син. Обвинителството на кантонот Тузла (ТК) го објави грозоморното двојно убиство во Калесија, од кое е потврдено дека смртта на 37-годишната Инела Селимовиќ и на нејзиниот 13-годишен син била предизвикана од задушување, а наредена е обдукција, објави порталот Кликс.
Не се знае дали Селимовиќ, по кого трага полицијата, е вооружен.
– Синоќа полициски службеници од Управата за внатрешни работи на кантон Тузла, ПС Калесија, по пријава и со одобрение од кантоналниот обвинител и од судијата на Општинскиот суд, насилно влегле во стан во Калесија каде што пронашле безживотни тела на жена и на дете. Секторот на Полициската управа на Министерството за внатрешни работи на Тузланскиот кантон презема понатамошни активности – изјави портпаролката на Министерството за внатрешни работи на кантонот Тузла, Аднана Спречиќ.
Дежурниот обвинител и истражителите од Секторот за криминалистичка полиција на Министерството за внатрешни работи на Кантонот Тузла синоќа извршија увид на местото на злосторството во семеен стан во Калесија каде што беа пронајдени двете безживотни тела, на 37-годишна жена и на нејзиниот тринаесетгодишен син.
„Човекот, осомничен за двојно убиство, во моментов е во бегство и по него се трага“, се вели во соопштението на Обвинителството.
