Додик тврди дека екслидерот на босанските Срби е во опасност

Претседателот на Република Српска, Милорад Додик, оцени дека условите во кои поранешниот политички лидер на босанските Срби, Радован Караџиќ, ја издржува казната доживотен затвор во Велика Британија се „нехумани“ и дека неговата здравствена состојба е сериозно загрозена.

„Животот на Караџиќ е во опасност поради неадекватната медицинска грижа и поради нехуманите услови во британскиот затвор на островот Вајт“, напиша Додик на социјалната мрежа Икс по разговорот со ќерката на Караџиќ, Соња Караџиќ.

Според Додик, условите во кои се наоѓа Караџиќ ги прекршуваат сите меѓународни правила, како и Универзалната декларација за човекови права на ОН.

- Advertisement -

„Потребна е итна реакција за да му се обезбеди соодветна медицинска нега. Се надевам дека, и покрај непоправливите последици од досегашното лекување, ќе се преземат чекори за подобрување на состојбата“, дополни Додик.

Караџиќ беше уапсен во Белград во 2008 година и екстрадиран во Хаг каде што во 2016 година беше осуден на 40 години затвор за геноцидот во Сребреница и за други воени злосторства. Во 2019 година, неговата казна беше заострена на доживотен затвор.

фото: EPA-EFE/PETER DEJONG