Народна банка ја намали основната каматна стапка на износ од 5,35%

 Народната банка ја намали основната каматна стапка за 0,2 процентни поени на нивото од 5,35%. Каматните стапки на депозитите преку ноќ и на 7 дена се непроменети. 

„Ваквата промена во монетарната поставеност е одраз на поволните трендови кај инфлацијата и девизни резерви, а при и понатаму присутни и понагласени ризици поврзани со надворешното окружување. Покрај ова, има и ризици од домашните фактори коишто влијаат врз агрегатната побарувачка“, се наведува во соопштението од Централната банка..

Банката очекува дека нивото на каматните стапки, заедно со досегашните промени кај задолжителната резерва и преземените макропрудентни мерки ќе придонесат за ценовна стабилност на среден рок и за стабилноста на девизниот курс на денарот во однос на еврото.

- Advertisement -

Според НБ, инфлацијата се движи во рамките на очекувањата, девизниот пазар е стабилен, а податоците за последниот квартал лани покажуваат економски раст.

„Општо земено, последните остварувања кај клучните макроекономски показатели, како и согледувањата во однос на нивната идна патека, создадоа можност за натамошно внимателно нормализирање на монетарната политика. Ризиците од надворешното окружување и понатаму постојат и се понагласени, а будно се следат и ризиците од домашните фактори коишто можат да влијаат врз побарувачката и врз цените во следниот период. Оттука, водењето внимателни макроекономски политики ќе биде приоритет и во иднина. Народната банка и натаму е подготвена да ги употреби сите неопходни инструменти и да презема соодветни мерки со коишто ќе се придонесе за задржување на стабилноста на девизниот курс на денарот во однос на еврото и ценовната стабилност на среден рок3м се наведува во соопштението од Народна банка.