Американскиот претседател Доналд Трамп тврди дека „одредени класи луѓе во Јужна Африка се третираат многу лошо“ и дека таму се запленува земја, што го натера да го прекине секое идно финансирање на земјата додека не се истражи случајот. Трамп овие изјави ги дал без да обезбеди докази, јавуваат странските новински агенции.
„Јужна Африка конфискува земја и се однесува МНОГУ ЛОШО кон одредени класи на луѓе“, напиша американскиот претседател Доналд Трамп во објавата на својата социјална мрежа „Вистина“.
САД нема да го поддржат ова и ќе преземат акција, додаде Трамп, најавувајќи дека ќе го прекинат целото идно финансирање на Јужна Африка додека не заврши сеопфатната истрага за оваа ситуација.
Подоцна, Трамп на брифинг со новинарите рече дека „раководството на Јужна Африка прави некои ужасни работи“, без да наведе какви било примери, објави француската новинска агенција АФП.
Соединетите држави ветија дека ќе и помогнат на Јужна Африка со речиси 440 милиони долари во 2023 година, според најновите податоци на американската влада.
Јужноафриканскиот претседател Сирил Рамафоса минатиот месец потпиша закон со кој ќе и се олесни на земјата експропријацијата на земјиштето во јавен интерес. Законот има за цел да ги елиминира расните разлики во сопственоста на земјиштето кои сè уште постојат три децении по падот на апартхејдот во 1994 година.
За време на неговиот прв претседателски мандат, Трамп рече дека САД ќе ги истражат недокажаните убиства на бели фармери во Јужна Африка и насилните заплени на земјиште. Преторија тогаш одговори дека Трамп бил дезинформиран. Не е јасно дали администрацијата на Трамп спровела истрага, пренесува Ројтерс.
Блискиот сојузник на Трамп, технолошкиот милијардер Илон Маск е роден во Јужна Африка. Во 2023 година, Маск одговори на социјалната мрежа Х на видеото на екстремно левичарска јужноафриканска политичка партија која ја пее старата песна против апартхејдот „Убиј го Бурот“, пишувајќи: „Тие отворено промовираат геноцид врз белите луѓе во Јужна Африка. ”
Трамп, кој се врати во Белата куќа пред две недели, се опкружи со влијателни лица од Силиконската долина кои пораснаа за време на апартхејдот во Јужна Африка, според АФП. Меѓу нив е и Дејвид Сакс, кој стана цар на Трамп за вештачка интелигенција и криптовалути и кој го основаше платежниот систем PayPal со Маск. Трамп му довери на Маск да ја води Канцеларијата за владина ефикасност.
