Премиерот верува дека и соларниот парк набргу ќе стане реалност

Очекувам кон крајот на јуни да се постави камен темелник за ветерниот парк кој ќе биде во рамките на три општини – Штип, Карбинци и Радовиш, инвестиција од близу половина милијарда американски долари. Очекувам инвеститорот до тогаш да ги заврши сите проекти и се што е потребно за оваа инвестиција да стане реалност, истакна денеска премиерот Христијан Мицкоски.

За инвестицијата во соларниот парк кај некогашниот карго аеродром во Штип, посочи тој, има некои работи кои се нивелираат во насока на три прашања, но дека е оптимист дека се успешно ќе заврши и дека и оваа инвестиција ќе стане реалност.

– Првото прашање е категоријата на земја за кое мислам дека е веќе надминато, бидејќи имаме категорија на земја која не би сакале да ја урбанизираме на ваков начин, а е земјоделско земјиште што го користат земјоделците за обработка и производство на храна. Второто прашање е околу откупот на електричната енергија и цената и третото околу балансирањето, односно инсталирање на така наречени батерии кои ќе ја складираат произведената електрична енергија за да може да се користи во периодот на денот кога нема сончева радијација – рече Мицкоски во одговор на новинарско прашање по доделувањето клучеви од новата зграда наменета за социјално ранливите семејства во Општина Кочани.

- Advertisement -

Премиерот нагласи дека мисли оти ќе се најде соодветно решение и дека и таа инвестиција ќе стане реалност, но посочи дека не може ништо подетално да зборува додека се не се испегла.