Американската војска убила еден од водачите на сирискиот огранок на Ал Каеда, Хурас ал-Дин, огранок кој најави дека се распушта, соопшти денеска командата на американската војска за Блискиот Исток (Центком).
„На 30 јануари силите на CENTCOM извршија прецизен напад во северозападна Сирија, гаѓајќи го и убивајќи го Мухамед Салах ал Забир, висок член на терористичката организација Хурас ал-Дин, поврзана со Ал Каеда“, се вели во соопштението објавено на платформата Х. .
САД, чија војска е распоредена во Сирија како дел од меѓународната коалиција создадена во 2014 година за борба против џихадистите на Исламската држава, редовно извршува напади во земјата.
Малата џихадистичка група Хурас ал-Дин, сирискиот огранок на Ал Каеда, неодамна објави дека ќе биде расформирана, додавајќи дека одлуката ја донела по падот на сирискиот претседател Башар ал Асад.
Групата е на американската листа на терористички организации.
Бунтовничката коалиција предводена од радикалната исламистичка група Хајат Тахрир ал-Шам ја презеде власта во Дамаск по соборувањето на Асад на 8 декември.
Новите сириски власти најавија дека сакаат распуштање на сите вооружени групи.
Хурас ал-Дин, во кој има странски џихадисти, се наоѓаше во планинските области на северозападна Сирија, која беше упориште на бунтовниците пред да ја преземат власта во Дамаск.
