Дојде долгоочекуваниот момент кога легендарниот британски возач Луис Хамилтон го направи својот прв круг во болидот на Ферари, по шокантната одлука да го напушти Мерцедес и да премине во редовите на својот голем ривал.
Тест-возењето се одржа на патеката во италијанскиот град Фиорано, каде Хамилтон дебитираше во црвениот болид под дождливи услови. Неговиот појавување во „црвениот“ тим е историски момент што го означува почетокот на ново поглавје во кариерата на седумкратниот светски шампион.
Во претстојната сезона, Хамилтон ќе биде тимски колега со Шарл Леклер, создавајќи дует што ветува возбудливи борби на патеките ширум светот.
Со доаѓањето на Хамилтон, Ферари очекува враќање на тронот во Формула 1. Навивачите со нетрпение ја очекуваат сезоната, верувајќи дека овој трансфер ќе донесе нова енергија и многу победи.
Сите очи сега се вперени кон тимот од Маранело, кој со оваа аквизиција јасно порача дека е подготвен за големи успеси.
Хамилтон ги сподели своите емоции откако седна во болидот СФ-23 за време на тестирањето на патеката Фиорано во Италија.
– Првото искуство на возење автомобил Ферари беше едно од најдобрите чувства што некогаш сум ги доживеал во мојот живот. Кога го запалив моторот и тргнав на патеката, не можев да престанам да се насмевнувам од радост. Ова чувство ме потсети на првиот пат кога тестирав Формула 1 болид – тоа беше неверојатен и емотивен момент. Сега сум тука, речиси 20 години подоцна, и ги доживувам истите емоции – ја цитира „Planetf1“ изјавата на Британецот.
