Српскиот претседател Александар Вучиќ од Светскиот економски форум во Давос вели дека има цел Србија да почне да користи летечки автомобили во земјата во 2027 година. Вучиќ за српските медиуми рече дека за тоа разговарал со претставници на компанијата „Арчер“ на маргините на форумот.
Српскиот претседател објасни дека компанијата „Арчер“ е „една од најпознатите компании кои се занимаваат со летечки автомобили, беспилотни авиони и летачки возови“.
– Почнавме да преговараме за купување на најмалку три авиони, а разговараме и со нашите кинески пријатели, кои веќе имаат развиено многу и имаат летечки автомобили во неколку градови. Ќе побрзаме и ќе се обидеме да завршиме сè што е поврзано со подготовките и регулативите до средината на 2026 година, за да можеме да возиме летечки автомобили во 2027 година – рече Вучиќ.
Тој изјави дека на меѓународната специјализирана изложба Експо 2027, на која е домаќин, Србија сака да покаже „дека е најбрзо модернизирана и најбрзо растечка земја во Европа“.
– Веќе потпишавме некаков меморандум со компанијата Арчер и договоривме за Expo 2027. Ме интересираше дали машината може да биде загрозена ако дојде јато птици. Навистина не може и е многу побезбедно од хеликоптер – додаде Вучиќ.
