120 балистички ракети од Северна Кореја на пат кон Русија

Северна Кореја почна да распоредува специјална ракетна единица во западниот дел на Русија, која би можела да располага со до 120 балистички ракети и шест лансери за напади врз Украина. Според украинското воено разузнавање, околу 90 севернокорејски војници треба да бидат стационирани во регионот Воронеж и вклучени во руската 112. ракетна бригада.

Станува збор за ракетите KN-23 и KN-24, оружје што Русија веќе го користи во нападите врз украинска територија. Пјонгјанг, според украинските разузнавачки податоци, неодамна испратил нова пратка од 40 вакви ракети заедно со воен персонал. Конечниот број ракети и начинот на распоредување на севернокорејската единица допрва треба да бидат утврдени во разговори на високо ниво.

Украина е посебно загрижена бидејќи станува збор за балистички ракети. Тие се движат со голема брзина и оставаат многу помалку време за реакција од крстосувачките ракети и беспилотните летала. Украина има ограничен број системи способни да пресретнуваат вакви цели, а Русија во последниот период ја зголемува употребата на балистички проектили токму за да ја оптовари украинската противвоздушна и противракетна одбрана.

- Advertisement -

KN-23 по концепцијата потсетува на рускиот „Искандер-М“, но е поголем и потежок, а неговата траекторија може дополнително да го отежне пресретнувањето. Севернокорејските ракети во минатото беа оценувани како помалку прецизни од руските еквиваленти, но западни и украински аналитичари забележуваат дека Пјонгјанг ги усовршува системите користејќи ги искуствата од нивната реална употреба во Украина.

Русија користи севернокорејски балистички ракети уште од крајот на 2023 година. Украинските власти во ноември 2024 година соопштија дека Москва дотогаш добила повеќе од 100 ракети KN-23 и KN-24, а подоцнежните процени покажуваат дека испораките продолжиле. Во април годинава украинското Министерство за одбрана објави и резултати од анализата на остатоци од севернокорејските ракети употребени во руските напади.

Распоредувањето севернокорејска ракетна единица во Русија претставува ново ниво во воената соработка меѓу Москва и Пјонгјанг. Досега Северна Кореја испраќаше ракети, артилериска муниција, воена техника и војници, но присуството на специјализиран персонал кој би оперирал со ракетни системи значително ја продлабочува директната севернокорејска улога во војната. Украинскиот претседател Володимир Зеленски тврди дека Русија се подготвува да прими и десетици илјади дополнителни севернокорејски војници.

За Киев проблемот е и количеството. Дури и севернокорејските ракети да бидат помалку прецизни од руските „Искандери“, голем број дополнителни балистички проектили може да ја принуди Украина да троши скапи и ограничени противракетни ресурси. Токму затоа Киев повторно бара засилување на воздушната одбрана, предупредувајќи дека Москва и Пјонгјанг ја претвораат војната во полигон на кој Северна Кореја стекнува борбено искуство и го усовршува сопственото оружје.