Шест торби со вкупно 100 пакувања марихуана заедно тешки 100 килограми биле запленети во полициската акција во Струмица во понеделникот, 30 јуни, информираше Министерството за внатрешни работи. Полицијата излезе со детали за апсењето на нарко-дилери за кое пишуваа македонските медиуми.
Според полицискиот билтен, на улица Климент Охридски во градот, кон 18.30 часот, биле лишени од слобода Е.Б.(32) од село Попчево, струмичко и А.С.(39) и А.С.(24) од скопско. Дрогата била пронајдена при претрес на возилото „голф“ кој имал фалсификувани регистарски таблички.
Акцијата била спроведена со помош на Агенцијата за национална безбедност по наредба на јавен обвинител, се додава во соопштението. Лицата треба да бидат изведени пред судија во Основниот суд во Струмица откако претходно ќе им биде поднесена кривична пријава.
Заплената е еден од најголемите удари врз нарко-пазарот во регионот во последните месеци. Возилото во кое се превезувала дрогата било лоцирано и блокирано на влез во Струмица, а при претресот било откриено дека целата количина била уредно спакувана за меѓународен транспорт.
Министерот за внатрешни работи Панче Тошковски изјави дека ќе има нула толеранција за криминалот. Тој лично ја посети Струмица по акцијата, ја пофали полицијата за брзата и прецизна реакција.
