Во срцето на Пјонгјанг, главниот град на Северна Кореја, се издигнува Ryugyong Hotel – архитектонско ремек-дело кое со децении го носи неславниот епитет „хотел на пропаста“.
Изградбата на хотелот започнала во 1987 година со големи амбиции да стане највисокиот хотел во светот, но на крајот станал симбол на пропуштени можности.
Проектот бил инициран со цел хотелот да биде отворен во 1989 година, токму за време на Светскиот фестивал на младите и студентите.
Со својата височина од 304 метри и пирамидален дизајн, објектот требало да го надмине рекордот за највисок хотел, тогаш држан од Јужна Кореја. Според оригиналниот план, хотелот требало да има 105 спратови, 3.000 соби и пет луксузни ресторани.
Меѓутоа, и покрај вложените 700 милиони евра, изградбата била забавена поради економската криза која ја зафатила Северна Кореја во 1990-тите години.
До 1992 година зградата ја достигнала планираната висина, но изградбата запрела, а на врвот останал недовршен кранот кој сведочел за прекинатиот проект. Наредните 16 години хотелот бил напуштен, со својот масивен бетонски екстериер кој доминирал над градот.
Во 2008 година, проектот бил повторно оживеан со нови вложувања. Металната и стаклената фасада, која чинела дополнителни 170 милиони евра, значително го подобрила визуелниот впечаток на објектот.
Во 2012 година, германската хотелска група „Кемпински“ најавила дека хотелот ќе биде делумно отворен во 2013 година, но подоцна се повлекла од проектот.
Во 2018 година, хотелот добил LED осветлување, а на фасадата бил поставен натписот „Hotel Ryugyong“, обидувајќи се да му даде нов живот. Сепак, и покрај овие напори, хотелот останува затворен за посетители, носејќи ја приказната за едно време на големи амбиции и економски предизвици.
Ryugyong Hotel останува архитектонска икона и сведоштво за контрастите на една земја – од грандиозни соништа до сурова реалност.
