Остатоците од руски дрон паднаа врз станбена зграда во Киев. Две лица беа убиени, неколку беа повредени.
Две лица загинаа, а неколку други се повредени во рускиот напад врз Киев откако остатоци од дрон паднаа врз станбена зграда во градот, соопштија денес спасувачките екипи и градоначалникот Виталиј Кличко. Пожари избувнаа во неколку области на украинската престолнина.
Кличко напиша на мрежата Телеграм дека остатоците од руски дрон паднале врз петкатна станбена зграда во населбата Шевченко, при што загинале две лица. Најмалку осум лица се повредени, од кои четворица се хоспитализирани.
Според цивилната одбрана и воената администрација на Киев, пет лица се повредени во нападот, додека спасувачките служби известија само дека пронашле две тела при гаснење пожар во областа по нападот.
Украински дронови летаат кон Москва
Во меѓувреме, украински беспилотни летала летаа кон Москва трета ноќ по ред. Градоначалникот на руската престолнина, Сергеј Собјанин, напиша на Телеграм дека воздушната одбрана пресретнала девет од нив. Тој не спомена жртви или штети. Според руската новинска агенција Тас, сообраќајот на московскиот аеродром Шереметјево е привремено ограничен.
