Утре започнува судењето за трагедијата во „Пулс”: 38 обвинети, засилени безбедносни мерки

Утре во 9:30 часот во судницата на Казнено-поправната установа Идризово започнува судењето за трагедијата во дискотеката „Пулс” во Кочани, во која животот го загубија 63 лица, а околу 200 беа повредени. Ова е еден од најтешките случаи со кој се соочува македонското правосудство во последните години.

Случајот опфаќа 38 обвинети – 35 физички и три правни лица. Обвинителниот акт се однесува на тешки дела против општата сигурност, вклучувајќи сериозни пропусти во организацијата на обезбедувањето на објектот. Меѓу обвинетите се сопственици на локали, управители, инспектори, градоначалници, членови на обезбедување и државни службеници.

Судскиот процес ќе го води судијката Диана Груевска Илиевска, додека обвинителството ќе биде застапувано од проширен тим од 15 јавни обвинители, со цел да се обезбеди ефикасна и фер постапка. Постапката ќе се води со темпо од две рочишта неделно.

- Advertisement -

Поради сериозноста на случајот и бројот на обвинети, првото рочиште ќе се одржи со засилени безбедносни мерки. Исто така, во судницата ќе биде присутна и лекарска екипа.

Судот упати апел до медиумите за достоинствено известување без сензационализам, со почит кон жртвите и нивните семејства. Трагедијата во „Пулс” предизвика длабока болка во македонското општество и остави траги кои и денес не се заборавени.

Судењето се очекува да трае подолг период, со оглед на сложеноста на случајот и бројот на обвинети. Правдата за жртвите и нивните семејства останува главен приоритет на оваа постапка.