Бугарија ќе се приклучи на европскиот план за целосно прекинување на увозот на руски гас до крајот на 2027 година, што значи дека Москва ќе ја изгуби последната рута за гасовод до ЕУ низ таа земја, а Унгарија и Словачка ќе останат без директни испораки.
– Како членка на ЕУ, Бугарија ги усогласува своите потези со европското законодавство и политики, вклучително и планираната забрана за увоз на руски гас до крајот на 2027 година. До 1 јануари 2028 година, се очекува потрошувачката на руски гас низ цела Европа целосно да се укине – изјави министерот за енергетика Зечо Станков за Политико.
Минатата недела, на маргините на Генералното собрание на ОН во Њујорк, премиерот Росен Жељазков потврди дека Бугарија ќе го поддржи европскиот план, откако американскиот претседател Доналд Трамп во својот говор ја повика Европа да престане да купува руска енергија.
Уште во јуни, Брисел презентираше нацрт-закон со кој ќе се забрани увозот на руски гас, прво преку раскинување на краткорочните договори веќе оваа година, а потоа преку постепено раскинување на долгорочните аранжмани до крајот на 2027 година. Членките на ЕУ и Европскиот парламент во моментов водат преговори за овој предлог, а конечен договор се очекува до крајот на годината.
Бугарија е последната точка за влез на руски гас во ЕУ преку гасоводот Турски тек, откако Украина не го продолжи договорот за транзит на почетокот на годината. Другите московски рути се или оштетени или под санкции.
Одлуката веќе предизвика загриженост во Унгарија и Словачка, кои сè уште добиваат околу 70% од своите потреби за гас во просек од руски извори, тврдат дека забраната значително би ги зголемила цените поради ограничените алтернативни патишта.
Сепак, експертите истакнуваат дека двете земји можат да обезбедат доволно гас преку терминалите за течен природен гас (ТПГ) во ЕУ или дополнителни испораки од Норвешка.
Унгарскиот министер за надворешни работи Петер Сијарто рече дека Софија го уверила дека „нема да ја стави Унгарија во тешка ситуација“, нагласувајќи дека тоа е само предлог, а не одлука.
Бугарија веќе работи на регионален модел на заеднички тендери за увоз на американски течен природен гас (ТПГ).
– Започнавме дискусии со нашите соседи за можноста за заедничка набавка за долгорочни договори за ТПГ од САД, почнувајќи од следната година – рече Станков.
Експертите проценуваат дека унифицираната побарувачка би ја намалила цената на ТПГ, со оглед на тоа што поединечните количини досега беа премногу мали за да привлечат американски извозници.
Гасоводот „Турски Ток“ е проект на рускиот „Газпром“ и турскиот „Боташ“, кој треба да обезбеди стабилно снабдување со гас за Турција, јужна и југоисточна Европа.
Гасоводот е долг 930 километри со капацитет од 31,5 милијарди кубни метри гас годишно. Првиот крак поминува низ Турција, додека вториот крак оди до Бугарија, Србија и Унгарија. Србија и Бугарија го нарекуваат тој дел од гасоводот „Балкански поток“. Капацитетот на секој крак е 15,75 милијарди кубни метри гас.
