Трипуновски ветува нулта толеранција за злоупотреби на ИПАРД-фондовите

Министерот за земјоделство, шумарство и водостопанство Цветан Трипуновски изјави дека Агенцијата за финансиска поддршка во земјоделството и руралниот развој и Министерството работат под строги правила кои мора да се почитуваат.

– Во делот на претходните истраги немам информација дали има епилог. Сигурно, кога ќе има, јавноста ќе биде информирана. Она што можам да го потенцирам во ова интервју е дека Агенцијата за финансиска поддршка во земјоделството и руралниот развој и Министерството за земјоделство, шумарство и водостопанство работат под строги правила кои мора да се почитуваат – истакна министерот во интервјуто за Радио Слободна Европа.

Министерот појасни дека министерството и Агенцијата работат на нулта толеранција во делот на злоупотреба на средства. Транспарентно се води целиот процес.

- Advertisement -

Тој ги повика сите граѓани кои имаат сознанија за можни пропусти да алармираат, по што веднаш ќе се преземат соодветни мерки.

– Самата Агенција и ревизорското тело редовно прават контроли во однос на исплатите по ИПАРД апликациите, со цел елиминирање на било каква злоупотреба – додаде министерот Трипуновски.

Според него, нема да се толерира злоупотреба на средства, а правилата за распределба на средства ќе се почитуваат максимално.