Новоизбраниот претседател, Доналд Трамп, им рече на илјадници поддржувачи на митингот во Вашингтон, еден ден пред неговата инаугурација, дека ќе воведе строги ограничувања за имиграцијата на првиот ден од неговиот нов мандат и вети дека брзо ќе го исполни клучното предизборно ветување.
– Кога сонцето повторно ќе зајде утревечер, инвазијата врз нашата земја ќе престане. Почнувајќи од утре, ќе дејствувам со историска брзина за зајакнување на силата на нашата земја и решавање на секоја криза со која се соочува – рече Трамп за време на собирот „Да ја направиме Америка повторно голема“, во спортската сала „Капитал Уан“.
Новоизбраниот претседател повтори дека ќе ја изврши „најголемата депортација во американската историја“, што ќе резултира со протерување „милиони имигранти“ од САД.
Говорот на Трамп на митингот беше сличен на говорите што ги одржа за време на неговата кампања во Белата куќа, во 2016 година. Тој испорача мешавина од фалење, лажни тврдења и големи ветувања на задоволство на собраните, според некои американските медиуми.
– Ова е најголемото движење во американската историја, откако пред 75 дена ја постигнавме најепската политичка победа што нашата земја некогаш ја видела – рече тој.
Неговиот говор е првото големо обраќање на Трамп во Вашингтон, по говорот што го одржа на 6 јануари 2021 година, непосредно пред неговите поддржувачи да упаднат во Капитол.
Идниот претседател вети дека ќе помилува многу од оние над 1.500 лица, осудени или обвинети во врска со нападот.
Митингот на Трамп, како и неговиот говор на инаугурацијата подоцна денес, би можеле да навестат каков тон планира да прифати за време на неговиот втор мандат во Белата куќа.
Граничната безбедност ќе биде значајна во првите извршни наредби на Трамп, кои најверојатно ќе ги класифицираат нарко-картелите како „странски терористички организации“, ќе прогласат вонредна состојба на границата меѓу САД и Мексико и ќе имаат цел да ја вратат политиката „остани во Мексико“, истакна неговиот советник за домашна безбедност, Стивен Милер.
Трамп вети дека ќе ги отстрани радикалните идеологии од војската на САД и рече дека ќе ѝ нареди на војската да изгради ракетен штит над САД, иако допрва треба да понуди детали како ќе го постигне тоа.
Тој, исто така, посочи дека ќе ја поништи „прекумерната декласификација“ на владините документи, што се чини дека е упатување на неговото федерално обвинение за задржување доверливи документи по напуштањето на функцијата.
Трамп вети дека ќе објави доверливи документи, поврзани со атентатите на претседателот Џон Ф. Кенеди, неговиот брат Роберт Кенеди и со лидерот за граѓански права, Мартин Лутер Кинг Џуниор.
