Стејт департментот вчера донесе одлука да ѝ одобри на израелската Влада можна продажба на комплети за наведувачка муниција, поддршка на муниција и сродна опрема по проценета цена од 510 милиони долари.
Агенцијата за соработка во одбраната и безбедноста го издаде потребниот сертификат со кој го информира Конгресот, се наведува на веб-страницата на агенцијата.
Израелската влада побара купување на 3.845 комплети за наведување на муницијата за заеднички директен напад и 3.280 комплети за наведување на тело од бомба MK 82.
Дополнително, во купувањето ќе бидат вклучени инженерска, логистичка и техничка поддршка за американската влада и на изведувачите, како и други поврзани елементи на логистика и програмска поддршка.
„САД се посветени на безбедноста на Израел и од витално значење е за националниот интерес на САД да му помогнат на Израел да развие и да одржи силен и подготвен капацитет за самоодбрана. Оваа предложена продажба е во согласност со тие цели“, се наведува на веб-страницата на агенцијата.
Предложената продажба треба да ја подобри способноста на Израел да се соочи со сегашните и со идните закани преку подобрување на способноста на земјата да ги брани своите граници, клучната инфраструктура и населбите.
Главен изведувач ќе биде компанијата „Боинг“, со седиште во Сент Чарлс, Мисури, а договорот не бара распоредување дополнителни претставници или изведувачи на американската влада во Израел.
Трамп ќе го пречека Нетанјаху во Белата Куќа
Во меѓувреме, најавена е средба меѓу американскиот претседател Доналд Трамп и израелскиот премиер Бенјамин Нетанјаху.
Трамп ќе го пречека Нетанјаху во Белата куќа на 7 јули, објави Aксиос, повикувајќи се на изјава на израелски функционер.
Израелски официјален претставник во Вашингтон, исто така, ја потврди средбата за следниот понеделник. Според него, двајцата лидери се очекува да разговараат за Иран, Газа, Сирија и за други регионални предизвици, објави Ројтерс.
Американскиот портал Аксиос минатата недела објави, исто така, повикувајќи се на свои извори, дека Нетанјаху сака да се сретне со Трамп во наредните недели за да разговара за заедничко американско-израелско бомбардирање на нуклеарната програма на Иран.
Портпаролката на Белата куќа, Каролин Ливит, минатиот четврток изјави дека нема одреден датум за посетата на Нетанјаху, но дека Трамп е „многу отворен“ за тоа.
Трамп го осуди актуелното судење за корупција против Нетанјаху како „лов на вештерки“, што беше поздравено од сојузниците на израелскиот лидер.
