Трамп им се закани на Русите: „Ако оваа војна не се реши, ќе им пратам Томахавк“

Американскиот претседател Доналд Трамп во неделата изјави дека не ја исклучува можноста за испорака на крстосувачки ракети „Томахавк“ во Украина, додавајќи дека овој потег би можел да го зголеми притисокот врз Русија и да помогне во завршувањето на војната.

Во разговор со новинарите на авионот „Ер Форс Уан“ на пат кон Блискиот Исток доцна во неделата, Трамп рече дека ќе разговара за ова прашање со Москва и ќе праша: „Дали тие (Русија) сакаат „Томахавците“ да доаѓаат кон нив“? „Не мислам така“, одговори тој.

Трамп додаде дека може да им каже на руските претставници: „Ако оваа војна не се реши, ќе им испратам „Томахавци“.

- Advertisement -

Украинскиот претседател Володимир Зеленски во последните недели постојано бараше ракети „Томахавк“. Нивниот максимален дострел од 2.500 километри би ѝ овозможил на Украина да погоди цели како што се рафинериите за нафта, дури и во азискиот дел на Русија.

Трамп го опиша „Томахавкот“ како „неверојатно“ и „многу офанзивно“ оружје и додаде: „И искрено, на Русија не ѝ е потребно“. Тој рече дека планира да разговара за ова прашање со Москва и дека го информирал и Зеленски.

Пред Трамп да ги даде тие изјави, Зеленски рече дека тој и американскиот претседател разговарале за системите за воздушна одбрана „Патриот“ и „Томахавците“ во телефонски разговор.

Зеленски напиша на „Телеграм“ дека Русија е загрижена за потенцијалната испорака на „Томахавците“ од страна на САД и дека таков притисок би можел да помогне во постигнувањето мир. Тој не потврди дали се договорени некои конкретни чекори.

Зеленски претходно рече дека Украина ќе ги користи ракетите „Томахавк“ само за воени цели и нема да напаѓа цивили во Русија, доколку САД ги испорачаат. „Никогаш не сме ги нападнале нивните цивили. Тоа е голема разлика помеѓу Украина и Русија“, рече украинскиот лидер за „Фокс њуз“.