Трамп го поддржал, Зеленски го отфрлил предлогот

Украинскиот претседател Володимир Зеленски го отфрли предлогот на Владимир Путин Украина да се повлече од Донецк и Луганск како дел од мировниот план, кој наводно бил поддржан од Доналд Трамп. Според Ројтерс, во телефонски разговор со Трамп кој траел час и половина, Зеленски јасно ставил до знаење дека таква опција не е можна.

Лидерите на НАТО и европските земји, исто така, се придружиле на повикот.

„Според извор запознаен со разговорот, Трамп му рекол на Зеленски дека Путин е подготвен да престане да се бори на други фронтови ако Украина се повлече од источниот дел на земјата. Зеленски го отфрлил ова, нагласувајќи дека нема повлекување од Донецк“, пишува Ројтерс.

- Advertisement -

Русија контролира три четвртини од регионот Донецк и вкупно петина од територијата на Украина.

Изворот рекол и дека Трамп му рекол на Зеленски дека треба да постигне договор со Русија, бидејќи „Русија е голема земја, а Украина не е“.

„Фајненшл тајмс“ претходно денеска објави дека Путин, на самитот со Трамп, побарал Украина да се повлече од регионот Донецк во замена за замрзнување на фронтот во регионите Херсон и Запорожје, анализира хрватски Индекс.

Во текстот на Индекс се посочува дека „Њујорк тајмс“ потоа објави дека Трамп го поддржува планот и дека американскиот претседател верува дека мирот може брзо да се постигне ако Украина се согласи да го предаде остатокот од Донбас, вклучително и областите што не се заземени од руските сили.

Трамп и Зеленски треба да се сретнат во понеделник во Белата куќа, а поканети се и европски лидери, иако сè уште не е јасно кој од нив ќе одговори. Зеленски претходно изјави дека нема да им го даде Донбас на Русите.

Зеленски јасно ја отфрли можноста за повлекување од Донбас и минатата недела.

– Ако денес се повлечеме од Донбас – од нашите утврдувања, од теренот и височините што ги држиме, очигледно ќе им го отвориме патот на Русите за нова офанзива – рече украинскиот претседател.

Таквиот план би бил спротивен и на предупредувањата од европските лидери дека секој мировен договор мора да го почитува територијалниот интегритет на Украина и принципот дека меѓународните граници не можат да се менуваат со сила. Таквиот предлог би барал и одобрение од украинскиот парламент.