Премиерката на Талјанд, Петонгтарн Шинаватра, денеска беше разрешена од функцијата поради протечен телефонски разговор со премиерот на Камбоџа. Уставниот суд на Тајланд тврди дека таа му се додворувала на поранешниот камбоџански премиер Хун Сен, токму додека двете земји биле на раб на вооружен судир.
Во телефонскиот повик може да се чуе како Петонгтарн го нарекува лидерот на Камбоџа „чичко“ и ја критикува тајландската армија во време кога се јавуваат тензии на границата меѓу двете земји. Повикот, протечен од самиот Хун Сен во месец јуни, ѝ наштети на нејзината репутација, а критичарите ја обвинија за поткопување на армијата, пишува Би-Би-Си.
Петонгтарн беше шестиот лидер кој доаѓа од или е поддржан од семејството Шинаватра, кое веќе две децении има доминантно влијание во тајландската политика. Таа е петтиот премиер кој го загубил мандатот по одлука на Уставниот суд во последните 17 години.
Само неколку недели по повикот, на 1 јули оваа година, судот ја суспендирал Шинаватра, додека истрагата за повикот продолжила. На границата меѓу Тајланд и Камбоџа избувнаа вооружени судири кои траеја 5 дена.
Сега парламентот на Тајланд треба да избере нов премиер.
Покрај тоа што е најмладата премиерка во историјата на земјата, Петонгтарн станува третата Шинаватра на која ѝ е прекинат премиерскиот мандат: нејзиниот татко Таксин беше соборен со воен удар во 2006 година, а нејзината тетка Јинглук исто така беше отстранета од Уставниот суд во 2014 година.
Таксин остана многу влијателен во политиката, иако сега е нејасно колку влијание ќе продолжи да има името Шинаватра.
