Апелацискиот суд во Нови Сад донесе одлука да го укине притворот и за последните петмина осомничени во случајот со падот на бетонската настрешница на железничката станица во овој град, во кој животот го загубија 16 лица. Наместо во затвор, осомничените ќе бидат во куќен притвор во траење од три месеци.
Со оваа судска одлука, ниту еден од вкупно 13-те лица кои беа приведени по трагедијата повеќе не се наоѓа во притвор.
Обвинението за случајот беше поднесено на 30 декември минатата година, но Вишиот суд во Нови Сад го врати на доработка во април, со образложение дека се потребни дополнителни разјаснувања за да се утврди суштината на случајот. Тоа значи дека постапката сè уште е во фазата на истрага.
Покрај ова, со постапката се занимава и Вишото јавно обвинителство во Белград, кое уште на почетокот на март поднесе обвинение за сериозни пропусти во изведбата и надзорот на објектот.
Реконструираната зграда на железничката станица беше свечено отворена само четири месеци пред несреќата, со тврдење дека „ги надминува европските стандарди“. Трагедијата предизвика бран незадоволство и масовни протести низ Србија, со барања за политичка и институционална одговорност за загубените животи.
