Десничарската партија Алтернатива за Германија (АфД) го поздрави неуспехот на конзервативниот лидер Фридрих Мерц да биде избран за следен канцелар на земјата во првиот круг гласање во парламентот.
Лидерката на АфД, Алис Вајдел, рече дека резултатот, според кој на Мерц му недостигаа 6 гласа од потребното апсолутно мнозинство, ја покажал „слабата основа“ врз која е изградена коалицијата на конзервативниот лидер со социјалдемократите.
– Мерц беше оштетен од самиот почеток. Тој ја плати цената за сите негови сплетки во пресрет на изборите, за досега невидената монструозна изборна измама – рече првиот секретар на парламентарната група на АфД, Бернд Бауман во видео објавено на Икс.
Според Бауман, следниот круг на гласање најверојатно ќе биде закажан за среда.
АфД е најголемата опозициска партија откако заврши на второ место зад Христијанско демократската унија (ЦДУ) на Мерц на предвремените избори во февруари.
Откако минатиот месец склучи коалициски договор со Социјалдемократите (СПД), Мерц денеска требаше да биде избран за канцелар, што е последната пречка за новата влада да ја преземе функцијата.
Во пресрет на гласањето, Мерц веќе наиде на критики, вклучително и од неговите сопствени редови, при што некои го обвинија дека го разредува партискиот став за да постигне договор со СПД, јави ДПА.
