Соединетите Американски Држави тврдат дека помеѓу 1.000 и 5.000 кубански граѓани се борат на страната на Русија во Украина, според документ на американскиот Стејт департмент кој, според Ројтерс, бил испратен до американските дипломатски мисии низ целиот свет.
Во писмото Куба се нарекува „најголем странски снабдувач на војници за руска агресија, веднаш по Северна Кореја“.
Американските претставници тврдат дека Москва го зголемила ангажманот на странски волонтери во последните месеци, особено на Кубанците.
Исто така, се наведува дека украинските претставници ги предупредиле своите американски колеги за, како што велат, растечкиот број кубански платеници што Русија наводно ги регрутира за фронтот.
Сепак, само разликата во бројките – од 1.000 до 5.000 – покажува колку се нејасни овие податоци и колку е тешко да се потврди вистинската состојба на терен. Покрај тоа, Стејт департментот во голема мера ги темели своите тврдења на изјави од украински извори, што исто така остава простор за сомнеж во веродостојноста на тврдењата.
Според некои анализи, ваквите тврдења се темелат на напорите на Вашингтон да го спречи усвојувањето на резолуцијата на ОН со која се бара укинување на ембаргото на САД против Куба. Имено, во своите дипломатски пораки до своите сојузници, САД се обидуваат да ја прикажат Хавана како активен сојузник на Москва и со тоа политички да ја дискредитираат.
Од друга страна, познато е дека одреден број странски доброволци навистина се борат на страната на Русија во Украина, на кои им се нуди руско државјанство и социјални бенефиции како стимулации. Москва веќе воспостави сличен модел на соработка со Северна Кореја – минатата зима. Сепак, Пјонгјанг ги испрати своите војници во Русија како дел од стратешкото партнерство на двете земји, а тоа беше за време на борбите за регионот Курск.
Иако не е познато дали некои севернокорејски војници останале во Русија, двете земји постојано го нагласуваат своето „воено братство“ во последните месеци. По овој повод беа организирани заеднички церемонии, а севернокорејскиот лидер Ким Џонг Ун лично се сретна со војниците кои учествуваа во борбите во Русија – што јасно покажува дека Москва и Пјонгјанг не ја кријат својата соработка, туку сè повеќе ја претставуваат како симбол на заедничка борба.
Поверојатно е дека вклучувањето на Кубанците на фронтот би можело да биде резултат на индивидуална одлука на економските мигранти во Русија. Со учество во конфликтот, тие би можеле да го решат својот статус, но и статусот на нивните семејства во Руската Федерација. Отворен однос со Хавана (како во случајот со Пјонгјанг) е малку веројатен. Друга опција е дека Украинците им пишале на своите американски колеги, кои се малку полоши по географија, за вклучувањето на Русите од регионо Кубањ.
фото: EPA-EFE/MAXIM SHIPENKOV
