Од денеска до 1 септември компаниите кои имаат зелени инвестиции можат да аплицираат субвенции за вработување.
Министерството за економија и труд преку Агенцијата за вработување го објави јавниот повик за мерката „Поддршка за креирање на нови работни места преку зелени инвестиции“, која е дел од Оперативниот план за активни програми и мерки за вработување и услуги на пазарот на трудот за 2025 година.
Преку оваа мерка се планира да се вработат 200 невработени лица – активни баратели на работа.
Финансиската поддршка се доделува во вид на неповратни грантови од 250.000 до 750.000 денари, зависно од бројот на новоотворени работни места: 250.000 денари за едно ново вработување,500.000 денари за две нови вработувања и 750.000 денари за три нови вработувања.
Право на учество имаат микро, мали и средни претпријатија од приватниот сектор кои ги исполнуваат условите.
Kомпаниите со доделените пари од државата ќе можат да финансираат набавка на нова опрема и машини, софтвер и лиценци, опрема за обновливи извори на енергија, како и материјали за енергетска ефикасност. Приоритет имаат компании од секторите: преработувачка индустрија, земјоделство, шумарство и водостопанство, снабдување со вода и управување со отпад, градежништво и транспорт.
