Најдобриот светски тенисер на сите времиња, Новак Ѓоковиќ, сензационално е елиминиран уште на стартот од мастерсот во Индијан Велс, откако загуби во второто коло од Холанѓанецот Ботик ван де Заншлуп (2-6, 6-3, 1-6).
Поразот е уште посензационален ако се има предвид дека неговиот противник влезе во главната ждрепка како „среќен губитник“, додека, пак, Ѓоковиќ првпат од 2018 година испадна од Индијан Велс по само еден меч. Лошиот почеток на мечот беше клучен за Ѓоковиќ, кој во првиот сет направи 14 неизнудени грешки и освои само 4 од 20 поени на ритерн.
Во вториот сет, српскиот тенисер го подигна нивото на игра, го намали бројот на грешки и направи 2 брејка, што му донесе израмнување.
Сепак, третиот сет донесе нов голем пад во играта на седмопласираниот тенисер на АТП листата, кој му дозволи на ривалот да му „украде“ 2 сервис-гема, а поразот беше логична последица на толку очајниот натпревар.
Очигледно е дека Новак Ѓоковиќ е во играчка криза бидејќи од последниот пат. кога загуби 3 меча по ред, поминаа 2.542 дена или нешто помалку од 7 години.
