На Клиниката за онкологија и радиотерапија годишно се дијагностицираат околу 1 200 пациентки со рак на дојка

На Клиниката за онкологија и радиотерапија годишно се дијагностицираат околу 1 200 пациентки со рак на дојка, соопштија од Здружението посветено на пациенти со рак и нивните негуватели „Хема-онко“, одбележувајќи го почетокот на Месецот за борба против ракот на дојка.

Според Ана Марјановиќ од „Хема-онко“, овие пациенти се соочуваат со низа проблеми, почнувајќи од непроменети протоколи, немање тумор-бордови, периоди кога нема терапија, немање национална скрининг-програма на нулта и прв стадиум на рак.

– Околу 60 отсто од пациентките за првичната дијагноза, односно за биопсија одат на приватно. Уште попоразително е дека околу 80 отсто од овие новодијагностицирани пациенти, по добивање на дијагнозата наместо на Клиниката за онкологија, се упатуваат на хирургија. Тоа е така оти во државава не се променети протоколите и тумор-бордовите не функционираат. Работиме на тоа да се подобри оваа состојба и овие пациенти првично да дојдат на Клиниката за онкологија, а потоа со онкологот, хирургот и патологија да се направи најдобриот третман за нивно лекување – рече таа.

- Advertisement -

Очекува до крајот на годината државата да изнајде добра стратегија за скрининг-програма што ќе се следи со години.

– Во оваа скрининг-програма е најзначајно да се вклучат сите пациентки од 40 до 69-годишна возраст. Работиме на тоа во неа да бидат вклучени и пациентки под 40 години бидејќи има премногу млади пациентки со оваа болест – кажа Марјановиќ.

Еден од главните проблеми на Клиниката за онкологија се периодите кога нема терапија. Според неа, треба да се смени начинот како се набавува терапијата.

– Оваа година на Клиниката има за 65 отсто поголем буџет, што воопшто не е за занемарување. Но, и покрај тоа, во изминатите шест месеци се појавуваат дупки од една, две, па и три недели за одредени терапии. Тоа значи дека не се проблем само парите. Поради габаритните процедури, некоордираноста на административниот систем и немање механизми што ќе ги регулираат добавувачите, ние сме оставени со дупки од неколку недели. Затоа, сметаме дека треба да се примени набавката на лекови, да се размислува и за набавка на државно ниво, да не биде тоа на месечно ниво, да биде централизирана, со цел да се избегне ова – рече таа.

Според неа, Здружението работи и за набавка за понови терапии, петта генерација лекови, наменети за метастатските канцери.