Само неколку часа по телефонскиот разговор меѓу рускиот претседател Владимир Путин и неговиот американски колега Доналд Трамп, Русија изврши масовен ноќен напад врз Киев и врз други украински градови, испалувајќи рекордни 550 дронови и ракети.
Според властите во Киев, нападот повредил најмалку 23 лица, предизвикал пожари во објекти и автомобили, и оштетил железничка инфраструктура. Градоначалникот на Киев, Виталиј Кличко, соопшти дека експлозии биле регистрирани во 6 од 10 градски окрузи.
Украинскиот министер за надворешни работи, Андриј Сибиха, во објава на социјалната мрежа Икс нагласи дека на Москва мора да ѝ се наметнат најстрогите санкции без одлагање.
„Доста е чекање! Путин јасно го покажува своето целосно непочитување кон САД и кон сите што повикаа на крај на војната. На Москва мора да ѝ се наметнат најстрогите санкции без одлагање. На Украина мора да ѝ се обезбедат сите потребни средства за да се одбрани. Погрешните одлуки можат само да го охрабрат агресорот да го ескалира теророт. Секој криминален режим во светот сега внимателно ги следи постапките и одговорите на Путин на нив. Ако се извлече со сето ова, сите ќе добијат многу јасна порака. Престанете да чекате мир. Дејствувајте за да постигнете мир. Мир преку сила“, напиша Сибиха на „Икс“.
Нападот се случи само неколку часа по телефонскиот разговор меѓу Трамп и Путин, во кој, според медиумите, Трамп се обидел да го убеди рускиот лидер на примирје. Но, тој изјави:
– Ништо не постигнав со него. Разочаран сум. Не изгледа како да сака да запре – и тоа е жално.
Дополнително, германските и холандските разузнавачки служби објавија заеднички извештај во кој тврдат дека Русија сѐ почесто користи хемиско оружје во Украина – што е директно кршење на Конвенцијата за хемиско оружје, објави Гардијан.
Според податоци на украинската армија, Русија извела повеќе од 9.000 хемиски напади од почетокот на инвазијата во 2022 година, при што најмалку тројца војници загинале поради изложеност на отровни супстанции.
Холандскиот министер за одбрана Рубен Брекелманс оцени дека станува збор за систематска и масовна употреба на хемиско оружје и повика на нови санкции и целосна изолација на Русија.
