Русија го игнорираше ултиматумот на сојузниците на Киев за прекин на огнот во Украина со лансирање повеќе од сто дронови врз Украина синоќа, додека Киев чека одговор од Кремљ на предлогот на претседателот Володимир Зеленски лично да се сретне со Владимир Путин во четврток во Истанбул.
Киев и неговите европски сојузници побараа „целосно и безусловно“ 30-дневно примирје кое почнува од денес, за кое рекоа дека е предуслов за директни мировни преговори меѓу Русија и Украина во Истанбул, како што предложи рускиот претседател Владимир Путин.
Досега Русија не одговори на понудата на Зеленски за директни преговори со Путин, ниту на ултиматумот за прекин на борбите еден месец, а украинскиот министер за надворешни работи Андриј Сибига денес оцени дека Москва „целосно го игнорира“ предлогот на Западот за примирје.
Претседателот на Франција, Емануел Макрон, изјави дека денес попладне Украинците ќе разговараат за ова со неколку европски лидери.
На дипломатскиот фронт, работите се забрзаа во последните денови, бидејќи одделните разговори со двете страни иницирани од американскиот претседател Доналд Трамп се чинеше дека дојдоа во ќорсокак.
Киев и неговите европски сојузници, заедно со Вашингтон, во саботата ѝ поставија на Русија ултиматум за 30-дневен прекин на огнот, заканувајќи ѝ се на Москва со „масовни санкции“ доколку одбие.
Рускиот претседател го игнорираше ултиматумот, наместо тоа предложи „директни“ и „безусловни“ преговори меѓу Москва и Киев, кои ќе започнат во четврток во Истанбул.
Ова би биле првите разговори меѓу Русите и Украинците од првите недели од руската инвазија во февруари 2022 година, кога серија нивни состаноци, делумно и во Турција, не доведоа до мировен договор.
Зеленски одговори со тоа што го покани Путин да се сретне „лично“ во четврток во Истанбул, на што тој сè уште не одговорил. Реакција на Кремљ.
Украинскиот политиколог Володимир Фесенко го опиша повикот како „тактички потег“ во обид да се стави Путин во тешка позиција во процесот на преговори.
„Ако Путин ја одбие (оваа покана), тоа значи дека тој не сака да преговара и дека би можел да изгледа како губитник во очите на Трамп“, смета експертот.
Според Фесенко, Путин ќе отпатува во Истанбул доколку „лично го побара“ Трамп, кој е „главната движечка сила“ на преговорите.
Путин, кој продолжува да бара предавање на Украина, нејзино откажување од членството во НАТО и правото Москва да ја задржи украинската територија што ја анектираше, се чини дека има поинакво толкување, знаејќи дека неговата армија е во поволна позиција на фронтот.
Во саботата, тој не ја исклучи можноста за разговор за прекин на огнот за време на преговорите, но рече дека преговорите првенствено мора да се фокусираат на „основните причини за конфликтот“.
Покрај желбата за „демилитаризација“ на Украина, рускиот претседател бара општа ревизија на „безбедносната архитектура во Европа“, сметајќи го пристапот на НАТО кон границите на Русија како егзистенцијална закана.
Состанокот во Турција во четврток „барем ќе покаже дали е можен договор, а ако не, европските лидери и САД ќе знаат што да очекуваат и ќе можат да дејствуваат соодветно“, рече Трамп во неделата.
