Kако Европската Унија им помага на погодените во најопасните места за живеење во светот?!

Кампањата „Гласови на човештвото“ на Европската Унија носи трогателни приказни од хуманитарни работници во Газа, Украина и африканските бегалски кампови, покажувајќи дека хуманитарната помош е за вистински луѓе, вредности и секојдневна борба за достоинство.

Европската Унија ја започна кампањата „Гласови на човештвото“, потврдувајќи ја својата улога како водечки донатор на хуманитарна помош во светот и истакнувајќи ги принципите што го водат нејзиното дејствување во кризни ситуации: хуманост, неутралност, непристрасност и независност.

Со оглед на тоа што хуманитарните потреби низ целиот свет брзо растат, се проценува дека повеќе од 300 милиони луѓе ќе имаат потреба од итна помош до крајот на 2025 година. ЕУ останува цврсто посветена на обезбедување помош врз основа на хуманитарни принципи што го штитат човечкото достоинство и спасуваат животи.

- Advertisement -

Кампањата има за цел да поттикне разбирање, гордост и чувство на солидарност меѓу граѓаните на ЕУ, особено меѓу помладите генерации на возраст од 20-40 години, со тоа што ќе ги доближи до вистинските лица и вредности зад европската хуманитарна акција.

„Кампањата има за цел да ги истакне основните принципи што ја водат хуманитарната помош на ЕУ. Ова не се апстрактни вредности, туку принципи што спасуваат животи, овозможуваат хуманитарна акција и обезбедуваат помошта да стигне таму каде што е најпотребна“, рече Закаријас Џакумис, раководител на комуникациите во Генералниот директорат за хуманитарна помош на Европската унија.

Кампањата „Гласови на човештвото“ го доближува секојдневниот живот на вистинските хуманитарни работници на терен до јавноста, преку документарни приказни, содржини на социјалните медиуми и соработки со влијателни лица. Пораката е јасна: зад секој хуманитарен чин стои посветеност на човечкото достоинство, дури и во најтешките и најопасните околности.

Кампањата се фокусира на приказните на тројца хуманитарни работници поддржани од ЕУ во Газа, Украина и бегалска населба во Уганда, обезбедувајќи автентичен увид во вистинските предизвици на работењето на првите линии на глобалните кризи.

Кампањата трае до декември 2025 година и се спроведува во десет земји-членки на ЕУ – Хрватска, Чешка, Грција, Унгарија, Бугарија, Литванија, Полска, Шпанија, Италија и Франција.