Дали некој го видел Артан Груби деновиве? А, Васко Ковачевски? Македонија полека станува земја на исчезнати политичари – денес тука, утре… кој знае каде.
Артан Груби, човекот кој некогаш беше толку присутен во медиумите што се чинеше како да има свој клон за секоја прес-конференција, одеднаш исчезна од радарот. Можеби се повлекол во некоја планинска колиба да пишува мемоари со наслов “Како да бидеш невидлив во политиката” или можеби едноставно открил дека има поубав живот кога не мора да одговара на новинарски прашања.
Васко Ковачевски, пак, се стопил како сладолед на августовско сонце. Човекот што беше задолжен за енергетиката сега штеди енергија – својата лична. Можеби екстремните заштеди го довеле до тоа да ја исклучи дури и сопствената видливост во јавноста?
Во оваа земја на чуда, исчезнувањата стануваат дел од политичкиот фолклор. Еден ден си на власт, следниот ден те бараат на молкот.com. Ама барем имаат креативни изговори: “Не сум исчезнат, само стратешки се прегрупирам.” Или омилената “Имам важни состаноци” – толку важни што никој не знае со кого или каде.
Па така, логично се поставува прашањето: Кој ќе биде следен во оваа игра на криенка? Некој министер што случајно си ја заборавил функцијата в такси? Градоначалник што решил да стане номад? Директор што одлучил дека е подобро да биде директно… неприсутен?
Се прифаќаат обложувања! Дали ќе биде некој од економскиот сектор што сфатил дека личната економија е поважна од државната? Или можеби некој од културата што решил да ја истражи културата на ненадејните пензионирања?
Како и да е, загрижените граѓани на социјалните мрежи веќе предлагаат да се печатат политичарите на картоните со млеко, под наслов “Видено последен пат во близина на државна функција”.
А за оние што се уште се видливи – не грижете се премногу. Невидливоста во политиката е можеби најголемата привилегија што може да ја имате кога истрагите тропаат на врата.
Но кој и да биде следен, едно е сигурно: во македонската политика, исчезнувањата имаат чудна навика да завршуваат со reappearing act – најчесто во некоја друга партија или на некоја удобна функција. Како што велат – политичарите не исчезнуваат, тие само се трансформираат.
Прашањето останува отворено: Кој ќе биде следен што ќе се придружи на клубот на невидливите?
Сашо Денесовски
