Израел денес продолжи со воздушното бомбардирање на Газа, при што загинаа најмалку четири лица. Според армијата, цел била терористичката инфраструктура. Хамас, во меѓувреме, го обвини Израел за кршење на договорот за прекин на огнот, додека Катар предупреди на ескалација на тензиите.
Израелската армија денес повторно изврши воздушни напади врз Газа, во кои загинаа најмалку четири лица, според локални медицински извори. Нападите биле насочени кон областа источно од Кан Јунис, а меѓу загинатите е и едногодишно девојче, објавува француската новинска агенција АФП.
„Свесни сме за нападот источно од жолтата линија, кој беше извршен со цел уништување на терористичката инфраструктура“, соопшти израелската армија во одговор на АФП, додавајќи дека не е запознаена со извештаите за жртви. Жолтата линија ја означува границата во Газа, зад која израелските сили се повлекоа според договорот за прекин на огнот.
Најновите израелски напади врз Газа следат по смртоносните напади во среда во кои загинаа најмалку 27 лица, според Цивилната одбрана на Газа. Израел изврши серија напади врз Газа откако прекинот на огнот стапи на сила на 10 октомври. Според Министерството за здравство на енклавата, во овие напади се убиени повеќе од 312 Палестинци.
Палестинското исламистичко движење Хамас одговори нарекувајќи го Израел „бесрамно непочитување на договорот за прекин на огнот“. Го повика американскиот претседател Доналд Трамп и другите медијатори да „преземат сериозни чекори за да ги спречат овие злосторства“. Катар, еден од медијаторите, исто така ги осуди денес новите израелски напади врз Газа, нарекувајќи ги опасна ескалација што го загрозува договорот за прекин на огнот.
