Израелските министри денес се согласија да ја интензивираат војната против Хамас во Газа, изјави неименуван функционер, што укажува дека планот е да се заземе поголема територија во палестинската енклава и дека за таа цел ќе бидат мобилизирани десетици илјади воени резервисти.
Планот, за кој официјалниот претставник рече дека ќе се спроведува постепено, би можел да доведе до проширување на воените операции во Газа кои продолжија во март откако Израел и Хамас не успеаја да се договорат за продолжување на осумнеделното примирје.
Началникот на Генералштабот на израелската армија, генерал Ејал Замир, во неделата изјави дека армијата повикува десетици илјади резервисти и дека Израел ќе „дејствува во дополнителни области“ во Газа и ќе продолжи со нападите врз инфраструктурата на милитантите во енклавата.
Израел веќе контролира околу половина од Газа, вклучувајќи ја тампон-зоната долж границата со Израел, како и три коридори што се протегаат од исток кон запад долж територијата. Тие ги турнаа Палестинците во сè помали површини на таа опустошена територија, пишува агенцијата АП. Израел со недели се обидува да го зголеми притисокот врз милитантната група Хамас и да ја охрабри да покаже поголема флексибилност во преговорите.
Израел ја прекина помошта за Газа на почетокот на март, а забраната останува на сила, туркајќи ги 2,3 милиони луѓе што живеат во Газа во она што се верува дека е најлошата криза од војната. Гладот бил широко распространет, а кражбите биле поттикнувани поради недостигот.
Израел ги продолжи нападите на територијата на 18 март, по двомесечно примирје, а оттогаш се убиени повеќе од 2.600 луѓе, според локалните здравствени претставници.
Претходниот прекин на огнот требаше да доведе до преговори меѓу страните за крај на војната, но како да се постигне тоа е главна точка на несогласување. Израел вели дека нема да се согласи да ја прекине војната сè додека Хамас не биде поразен, додека Хамас бара договор за постепено завршување на војната.
