Израел почна со ослободување палестински затвореници согласно договорот за прекин на огнот во Газа, соопшти Канцеларијата за медиуми на затворениците.
Канцеларијата соопшти дека денеска автобуси со ослободени затвореници тргнале од затворот Офер, западно од Рамала, кон градот Беитуниа на окупираниот Западен Брег.
Автобуси со ослободени затвореници, исто така, тргнале и од затворот Негев во јужен Израел, на пат кон Газа, соопшти Канцеларијата.
Ослободувањето доаѓа откако палестинската група на отпорот Хамас предаде 20 израелски заложници во рамки на првата фаза од договорот за прекин на огнот во Газа.
Претседателот на Србија, Александар Вучиќ го поздрави ослободувањето на израелско-српскиот државјанин Алон Охел, кој беше држен во заробеништво од Хамас повеќе од две години. Тој објави и фотографија од Охел со припадници на израелската армија по ослободувањето.
Во меѓувреме, израелски медиуми објавија дека договорот за ослободување на заложниците и прекин на огнот е постигнат со посредство на американскиот специјален пратеник Стив Виткоф и зетот на Доналд Трамп Џаред Кушнер. Минатата недела тие се сретнале со високиот функционер на Хамас, Халил ал-Хаја, во хотелот „Фор Сизонс“ во Шарм ел-Шеик.
