Германското државно обвинителство приведе тројца украински државјани под обвинение за подготовка на саботажа со експлозивни направи што требало да бидат испратени во поштенски пакети, беше објавено во среда.
„Јевген Б., Данил Б. и Владислав Т. изразија подготвеност да извршат напади со запаливи и експлозивни направи врз превоз на стока во Германија најдоцна до март 2025 година, во контакт со претставници на руската држава“, соопшти државното обвинителство на Карлсруе, кое презема случаи за кои постои сомневање дека претставуваат закана за уставниот поредок на Сојузна Република Германија.
Осомничените требало да испратат пакети од Германија во Украина кои требало да се запалат или експлодираат за време на транспортот. Како подготовка за овие напади, осомничените веќе испраќале пакети со GPS предаватели.
Двајца од осомничените се уапсени во Келн и Кобленц, а третиот во Швајцарија, а се подготвува негова екстрадиција во Германија.
Сите тројца се украински државјани.
Германските безбедносни агенции со месеци предупредуваат за можна саботажа од страна на руските тајни служби.
Минатата година, во јули, пакет испратен од една од балтичките земји експлодираше во логистичкиот центар на DHL во Лајпциг. Пакетот првично требало да експлодира во транспортниот авион.
„Ги следиме агресивните дејствија на руските тајни служби“, изјави тогаш Томас Халдеванг, раководител на Федералната канцеларија за заштита на уставниот поредок.
