Заклучно со ноемврискиот циклус, 42 национални селекции обезбедија пласман на Светското првенство што следното лето ќе се одржи во САД, Канада и Мексико. На располагање остануваат уште шест места, за кои ќе се борат 22 репрезентации во европските и интерконтиненталните квалификации.
Меѓу нив се издвојуваат две селекции кои имаат неверојатно необичен пат до можниот пласман — едната со десет порази, другата без ниту една победа во квалификациите, но сепак со реални шанси да се најдат на Мундијалот благодарение на специфичниот систем и новиот формат. Станува збор за Шведска и Боливија кои најблаго речено, имаа чуден пат.
Првата селекција, репрезентацијата на Боливија заврши едвај над дното во регионалниот круг, со шест победи, два реми и десет порази, ефект што во нормални околности никогаш не би бил доволен за место на Светско првенство. Но со проширувањето на турнирот и дополнителните квалификациски патеки,Боливија има реална шанса да замине во Северна Америка.
Во дополнителните квалификации, прво ќе игра против Суринам, а ако помине, ќе се соочи со Ирак во финалето. Реално е да се каже дека не е аутсајдер во ниту еден од тие натпревари. Напротив.
Втората селекција, Шведска пак, има уште поекстремен случај. Го заврши својот настап во групата со два нерешени натпревари против Словенија и четири порази, по два од Швајцарија и Косово. Сепак, благодарение на освојувањето на првото место во својата група во Ц Лигата на нации, Шведска се избори за дополнителни квалификации, а и таму беше доста фаворизирана при ждрепката и имаше голема среќа. Скандинавците ќе играат на неутрален терен против Украина во полуфиналето, додека во евентуалното финале ќе се соочат со победникот од натпреварот помеѓу Полска и Албанија на домашен терен.
Дополнително, новиот селектор на оваа репрезентација има на располагање состав кој вредносно се вбројува меѓу најскапите десет во светот. Со малку дисциплина и спортска среќа, селекцијата би можела да избори пласман на Мундијалот дури и без ниту една победа во сите одиграни квалификациски натпревари, доколку плејофот го мине по пат на ремија и пенали.
Двете ситуации стануваат дел од најчудните квалификациски приказни во поновата историја на фудбалот, и последица на новите, проширени правила на глобалното натпреварување.
