Дали групата целосно го прифати планот на Трамп?

Високиот функционер на палестинското милитантно движење Хамас, Махмуд Мардави, денеска ги негираше медиумските извештаи дека групата наводно се согласила да го положи оружјето, како што е предвидено во планот на американскиот претседател Доналд Трамп за решавање на конфликтот во Газа.

„Махмуд Мардави ги негираше лажните тврдења на телевизијата Ал Хадат и голем број други медиуми во врска со напредокот на преговорите за прекин на огнот во Појасот Газа и ставот на движењето по прашањето за предавање на оружјето“, се наведува во соопштението на Хамас, објавено на каналот Телеграм, пренесуваат руските медиуми

Мардави додава дека „овие изјави немаат основа и имаат за цел да ја дискредитираат позицијата на Хамас и да ја измамат јавноста“.

- Advertisement -

Претходно, саудиските телевизиски канали Ал Арабија и Ал Хадат, повикувајќи се на извори, објавија дека Хамас ги информирал САД дека прифаќа да го положи оружјето.

Хамас на 5 октомври објави дека се согласува да ги ослободи сите живи заложници, да ги врати телата на мртвите заложници и да ја предаде администрацијата на Газа на палестинско тело на независни технократи, а израелскиот премиер Бенјамин Нетанјаху објави дека Израел е „на прагот на многу големо достигнување“.

Потоа се појавија информации дека олитичкото и военото крило на Хамас не постигнаа консензус за разоружувањето, што е дел од предлогот на Трамп за прекин на војната. Волстрит џурнал, повикувајќи се на арапски посредници во преговорите објави дека главниот преговарач на Хамас, Калил ал-Хаја, и други политички претставници кои живеат надвор од Газа се подготвени да го прифатат предлогот за разоружување, „и покрај значајните резерви“.

Во исто време, лидерот на Хамас во Газа, Из ел-Дин Хадад, е отворен за предавање на офанзивното оружје на Хамас, како што се ракетите, но сака да го задржи „одбранбеното“ оружје на групата, како што се автоматските пушки.

Документот се состои од 20 точки, а во него, меѓу другото, се бара воспоставување привремена надворешна администрација во палестинската енклава и распоредување на меѓународни сили.

На 3 октомври, Хамас им го достави на медијаторите својот одговор на предлогот на Трамп, во кој изрази подготвеност да ги ослободи сите живи израелски заложници и да ги предаде телата на загинатите. Нова рунда индиректни преговори меѓу Израел и Хамас ќе се одржи денеска во Египет.